Ram Temple row: పీఎం మోదీ, అమిత్ షా రాజీనామాలకు కర్ణాటక కాంగ్రెస్ డిమాండ్

అయోధ్య రామాలయ నిర్మాణానికి సంబంధించిన విరాళాల విషయంలో ఇప్పుడు దేశ రాజకీయం ఒక్కసారిగా వేడెక్కింది. శ్రీరామ జన్మభూమి తీర్థ క్షేత్ర ట్రస్ట్లో భారీగా అక్రమాలు జరిగాయంటూ కర్ణాటక కాంగ్రెస్ తీవ్ర ఆరోపణలు చేసింది. ఈ వ్యవహారానికి నైతిక బాధ్యత వహిస్తూ ప్రధానమంత్రి నరేంద్ర మోదీ, కేంద్ర హోంమంత్రి అమిత్ షా, ఉత్తరప్రదేశ్ ముఖ్యమంత్రి యోగి ఆదిత్యనాథ్ తమ పదవులకు వెంటనే రాజీనామా చేయాలని డిమాండ్ చేస్తూ కర్ణాటక కాంగ్రెస్ ఒక సంచలన తీర్మానాన్ని ఆమోదించింది. వేల కోట్ల విరాళాలు ఏమయ్యాయి? బెంగళూరులో జరిగిన కర్ణాటక కాంగ్రెస్ సాధారణ సర్వసభ్య సమావేశంలో ఈ తీర్మానాన్ని ప్రవేశపెట్టారు. అయోధ్యలో రామాలయ నిర్మాణాన్ని పర్యవేక్షించేందుకు కేంద్ర ప్రభుత్వం... ప్రధానమంత్రి నరేంద్ర మోదీ నాయకత్వంలో ఆర్ఎస్ఎస్, విశ్వహిందూ పరిషత్ సభ్యులతో కూడిన 11 మంది సభ్యుల ‘శ్రీరామ జన్మభూమి తీర్థ క్షేత్ర ట్రస్ట్’ను ఏర్పాటు చేసిన విషయాన్ని కాంగ్రెస్ గుర్తుచేసింది. ఈ ట్రస్ట్ ఆలయ నిర్మాణం కోసం ప్రజల నుంచి, వివిధ ప్రభుత్వాల నుంచి వేల కోట్ల రూపాయలను విరాళాల రూపంలో వసూలు చేసిందని కాంగ్రెస్ తెలిపింది. బంగారం, వజ్రాల దుర్వినియోగం? ట్రస్ట్కు వచ్చిన ఈ విరాళాలకు సంబంధించిన సరైన లెక్కలను మెయింటైన్ చేయడం లేదని కర్ణాటక కాంగ్రెస్ సంచలన ఆరోపణ చేసింది. ప్రజలు భక్తితో ఇచ్చిన వేల కోట్ల రూపాయల నగదుతో పాటు బంగారం, వెండి, వజ్రాలు , ఇతర విలువైన కానుకలను కొందరు ట్రస్టీలు, ఉద్యోగులు ఓ పద్దతి ప్రకారం దుర్వినియోగం చేశారని కాంగ్రెస్ ఆరోపించింది. ఈ కుంభకోణానికి బాధ్యులైన వారిని గుర్తించి కఠినంగా శిక్షించేందుకు వెంటనే ఒక ప్రత్యేక విచారణ బృందాన్ని (SIT) ఏర్పాటు చేయాలని డిమాండ్ చేసింది. అసలు సూత్రధారులకు రక్షణ? ట్రస్ట్లో జరిగిన ఈ అవినీతిపై చర్యలు తీసుకోవాల్సింది పోయి.. అసలైన సూత్రధారులను కాపాడేందుకు కేవలం కింది స్థాయి ఉద్యోగులను మాత్రమే అధికారులు అరెస్ట్ చేస్తున్నారని కాంగ్రెస్ ఆరోపించింది. ఈ కుంభకోణం వల్ల కోట్ల మంది ప్రజలు ఆరాధించే శ్రీరాముడికి తీరని అవమానం జరిగిందని, దేశ గుర్తింపు, సంప్రదాయాలు, విలువలు దెబ్బతిన్నాయని ఆవేదన వ్యక్తం చేసింది. ఈ వ్యవహారంపై దేశవ్యాప్తంగా ప్రజల సెంటిమెంట్స్ దెబ్బతిన్నాయని, అందుకే దీనిపై సెంట్రల్ బ్యూరో ఆఫ్ ఇన్వెస్టిగేషన్ (CBI) చేత సమగ్ర విచారణ జరిపించాలని డిమాండ్ చేసింది. మోదీ, అమిత్ షా, యోగి రాజీనామా చేయాలి భారతదేశ సంస్కృతికి ప్రతీకగా నిలిచే రామాలయ ట్రస్ట్లో ఇలాంటి అక్రమాలు జరగడం అత్యంత విచారకరమని, దీనికి పాలకులే బాధ్యత వహించాలని కాంగ్రెస్ స్పష్టం చేసింది. ఈ మొత్తం వ్యవహారానికి నైతిక బాధ్యత వహిస్తూ ప్రధాని నరేంద్ర మోదీ, హోంమంత్రి అమిత్ షా, యూపీ సీఎం యోగి ఆదిత్యనాథ్ తక్షణమే తమ పదవులను వదిలిపెట్టాలని కర్ణాటక కాంగ్రెస్ తన తీర్మానంలో గట్టిగా డిమాండ్ చేసింది. ఇప్పుడు ఈ తీర్మానం దేశవ్యాప్తంగా పొలిటికల్ సర్కిల్స్లో ఒక పెద్ద సంచలనంగా మారింది.