RAAVAN | రావణ్‌పై ఉపా సరే: మరి పవన్ కల్యాణ్ గతంలో అన్న మాటలపై ఏ కేసులు పెడతారు?

చట్టవ్యతిరేక కార్యకలాపాల నిరోధక చట్టం (UAPA) కింద యూట్యూబర్ జోసెఫ్ అలియాస్ రావణ్ను దోషిగా చూస్తున్న ఆంధ్రప్రదేశ్ పోలీసులు ఆ రాష్ట్ర డిప్యూటీ సీఎం పవన్ కళ్యాణ్ విషయంలో మాత్రం అలా అనుకోవడం లేదు. వివిధ కేసుల్లో రావణ్కు నాలుగు సార్లు వరుసగా బెయిల్ వచ్చిన తర్వాత కూడా, మళ్లీ అతనిపై ‘ఉపా’ వంటి కఠిన చట్టాన్ని ప్రయోగించి జైల్లో నిర్బంధించడం వెనుక స్పష్టమైన రాజకీయ కారణాలు కనిపిస్తున్నాయి. ప్రశ్నిస్తానంటూ రాజకీయాల్లోకి వచ్చిన ఒక నేత అహాన్ని తృప్తి పరచడానికే ఈ అరెస్ట్ జరిగిందనేది అందిరికీ తెలిసిన విషయమే. రావణ్కు ఎలాగైనా బెయిల్ రాకుండా చేయాలన్న కసితో, పవన్ కళ్యాణ్ నుంచి వచ్చిన తీవ్ర ఒత్తిడితోనే చట్టాల పుస్తకాలను తిరగేసి మరీ పోలీసులు ఈ సెక్షన్లను బనాయించారని అర్థం అవుతోంది. క్యూబన్ విప్లవకారుడు చేగువేరానే తన స్పూర్తి అని పవన్ ఒకప్పుడు చెప్పుకున్నారు. ఇంతేకాదు నక్సలైట్లను ప్రశంసించారు. తుపాకీ పట్టి మావోయిస్టు ఉద్యమంలో చేరాలనుకున్నానని బహిరంగంగా ప్రకటించారు. అయితే అందంతా గతం. అధికారంలోకి రాగానే పవన్ అసలు రంగు బయటపడింది. ఇప్పుడాయన పూర్తిగా మారిపోయారు. తనను విమర్శించిన వారిని వెంటాడి వేటాడేందుకు ఏ స్థాయికైనా వెళ్లే రైట్ వింగ్ నాయకుడిగా ఆయన పరిణామక్రమాన్ని చూడొచ్చు. మొదటి నుంచి ఆయన చెప్తున్న, చేస్తున్న రాజకీయాల్లో ఉన్న డొల్లతనానికి ఈ వైఖరి నిలువెత్తు నిదర్శనం. ఈ విషయం గురించి మరింత చర్చించేముందు ఓ విషయం స్పష్టం చేస్తాను. తన రాజకీయ ప్రత్యర్థులపై సదరు యూట్యూబర్ వాడిన భాష ఏ రకంగానూ సమర్థనీయం కాదు. ఆయన మాటలు అభ్యంతరకం. అయితే వాటిని ఎదుర్కోవడానికి సాధారణ చట్టంలోనే తగిన నిబంధనలు ఉన్నాయి. రావణ్పై ప్రధానంగా రెండు రకాల కేసులు పెట్టారు. హిందూ మతాన్ని, హిందూ దేవతలను అవమానించారన్నది మొదటి కేసైతే, టాప్ మావోయిస్టు కమాండర్ హిడ్మా ఎన్కౌంటర్ నేపథ్యంలో నక్సలైట్లను ప్రశంసించారన్నది పోలీసుల రెండో అభియోగం. . సందర్భాన్ని వదిలేసి.. సిల్లీ క్లిప్పింగులతో కేసులా? రావణ్ చేసిన సుదీర్ఘ ప్రసంగాల్లోని సందర్భాన్ని పట్టించుకోకుండా, కేవలం కొన్ని సెలెక్టివ్ క్లిప్పింగులను మాత్రమే సాక్ష్యాలుగా చూపిస్తూ ఈ కేసుల విషయంలో ప్రభుత్వాన్ని కొంతమంది సమర్థిస్తున్నారు. క్రైస్తవం ఒక "చెడ్డ మతం" అని ఒక హిందూ నాయకుడు అన్న మాటలకు కౌంటర్ గా "ఎవరైనా హిందూ మతం గురించి కూడా ఇలాగే మాట్లాడితే ఎలా ఉంటుంది?" అని రావణ్ ప్రశ్నించారు. ఈ ఒక్క మాటను మాత్రమే కట్ చేసి హిందూ మతానికి వ్యతిరేకంగా మాట్లాడారంటూ ప్రచారం చేస్తున్నారు. నాగబాబు 2021 నాటి పోస్ట్ గుర్తుందా? తాను "సనాతని"గా మారడానికి ముందు నాస్తికుడినని పవన్ కళ్యాణ్ ప్రకటించుకున్నారు. మంచిదే. మరి ఆయన సోదరుడు నాగబాబు హిందూ మతం గురించి గతంలో ఏం మాట్లాడారో ఒకసారి గుర్తు చేసుకుందాం. 2021లో నాగబాబు 'X' (ట్విట్టర్)లో ఒక పోస్ట్ చేస్తూ.. "నువ్వొక అహంకారి, సాడిస్ట్, వంకర బుద్ధి వాడివి, సైకో, కపటి అని దేవుడిని కలిసి ముఖం మీదే చెప్పాలనుకున్నాను. ఆయన చేసిన పనులకు చనిపోయేదాకా ఉరివేయాలి. కానీ దురదృష్టవశాత్తూ అసలు దేవుడనేవాడే లేడు" అని రాశారు. దేవుడిని అలా విమర్శించిన నాగబాబు ప్రస్తుతం ఆంధ్రప్రదేశ్ శాసనమండలి (MLC) సభ్యుడిగా ఉన్నారు. మతపరమైన భావాలను గాయపరిచినందుకు రావణ్ ఎంత దోషో, నాగబాబు కూడా అంతే దోషి అవ్వాలి కదా? శతాబ్దాలుగా హిందూ మతం అనేక మార్పులతో పరిణామం చెందుతూ వచ్చింది. సంఘ సంస్కర్తల పోరాటంతో సతీసహగమనం, బాల్యవివాహాల వంటి అనాగరిక పద్ధతులు ఇప్పుడు హిందూ ధర్మంలో లేవు. అభ్యంతరకరంగా లేనంతవరకు ఏ మతమైనా విమర్శలకు అతీతం కాదు. హిందూ మతం కూడా అందుకు మినహాయింపు కాదు. ఇక జోసెఫ్ అనే వ్యక్తి తన పేరును 'రావణ్' అని మార్చుకోవడమే అతను హిందూ వ్యతిరేకి అనడానికి నిదర్శనమంటూ ప్రభుత్వ మద్దతుదారులు సోషల్ మీడియాలో వాదిస్తున్నారు. కానీ 1960లలోనే తెలుగుదేశం పార్టీ వ్యవస్థాపకుడు, దివంగత ఎన్టీ రామారావు 'భూకైలాస్' అనే సినిమా తీశారు. అందులో రావణాసురుడి గుణగణాలను, శివుడి కోసం ఆయన చేసిన ఘోర తపస్సును కీర్తించారు. సమాజం ఇప్పటికంటే ఎంతో నాగరికంగా ఉన్న ఆ రోజుల్లో ఆ సినిమా బ్లాక్బస్టర్ హిట్ అయిందన్న సంగతి సోషల్ మీడియాలో వాదులాటకు దిగుతున్న వారికి తెలుసో లేదో? ఇక రావణ్ చేసిన కామెంట్స్ ను చట్టపరిధిలో చూస్తే, అసలు అవి “ఉపా” పరిధిలోకి వస్తాయా రావా అన్నదే పెద్ద ప్రశ్న. గతంలో చంద్రబాబు నాయుడు ప్రభుత్వంలో (2014-19) ఇంటెలిజెన్స్ చీఫ్గా పనిచేసి రిటైర్డ్ ఐన ఐపీఎస్ అధికారి ఏబీ వెంకటేశ్వరరావు ఈ విషయంలో స్పందించారు. హిందువుల మతపరమైన భావాలను రావణ్ గాయపరిచాడనుకుంటే బీఎన్ఎస్ (BNS) సెక్షన్ 299 కింద మాత్రమే దోషి అవుతాడన్నారు. పవన్ కళ్యాణ్, అతని కుటుంబంపై అనుచిత వ్యాఖ్యలు చేస్తే పరువు నష్టం దావా వేయాలి తప్ప, 'దేశద్రోహి'గా చిత్రీకరించడం ఎంతమాత్రం సరికాదని ఆయన స్పష్టం చేశారు. మావోయిస్టు కోణం విషయంలో చట్టం ఏం చెబుతోంది? మావోయిస్టుల విషయంలో హిడ్మా ఎన్కౌంటర్ సందర్భాన్ని ప్రస్తావించిన రావణ్, సమాజంలో అన్యాయం ఉన్నంత కాలం ప్రతిఘటన ఉద్యమాలు వస్తూనే ఉంటాయన్నారు. స్పార్టకస్ కాలం నుండి హిడ్మా వరకు ఇదే జరిగిందన్నారు. అయితే అధికారంలోకి రాకముందు పవన్ కళ్యాణ్ అన్న మాటలు దీనికి భిన్నంగా లేవన్న సంగతిని ఇక్కడ గుర్తుచేసుకోవాలి. ఆదివాసీల దుస్థితిని, మావోయిస్టు ఉద్యమాన్ని ప్రస్తావిస్తూ గతంలో పవన్ ఏమన్నారంటే.. "గిరిజన ప్రాంతాల్లో అమ్మాయిలపై అత్యాచారాలు జరుగుతుంటే, పిల్లలు బడికి వెళ్లలేకపోతుంటే, అభివృద్ధికి నిధులు ఇవ్వకుండా వివక్ష చూపిస్తే వారేం చేయాలి? ప్రభుత్వాలు విఫలమైనప్పుడు, తమ ప్రాణాలను పణంగా పెట్టి రక్షించడానికి వస్తున్న మావోయిస్టుల వైపు చూడటంలో తప్పేముంది?" అని ప్రశ్నించారు. మావోయిస్టు ఉద్యమం ఉధృతంగా సాగుతున్న సమయంలోనే పవన్ ఈ మాటలన్నారు. కానీ మావోయిస్టు ఉద్యమాన్ని దాదాపుగా తుడిచిపెట్టామని కేంద్రం ప్రకటించిన ప్రస్తుత సందర్భంలో రావణ్ మాట్లాడారు. ఇంతేకాదు తాను నక్సలైట్ల అభిమానినని, చిరంజీవి రాజకీయాల్లోకి రాకముందు ఎన్నో ఇంటర్వ్యూలలో స్వయంగా పవన్ ఒప్పుకున్నారు. ఈ విషయంలో చట్టపరమైన నిబంధనలు ఏం చెబుతున్నాయో ఒకసారి చూద్దాం. మావోయిస్టు సానుభూతిపరుడిగా ఆరోపణలు ఎదుర్కొని, కన్నుమూసిన ప్రొఫెసర్ జీఎన్ సాయిబాబా కేసులో బాంబే హైకోర్టు డివిజన్ బెంచ్ స్పష్టమైన తీర్పునిచ్చింది. "ఎవరైనా వ్యక్తి మావోయిస్టు సాహిత్యాన్ని డౌన్లోడ్ చేసుకున్నంత మాత్రానో లేదంటే వారి సిద్ధాంతాన్ని సమర్థించిన్నంత మాత్రానో నేరం చేసినట్టు కాదు. ఏదైనా ఉగ్రవాద చర్యలో అతని ప్రత్యక్ష భాగస్వామ్యాన్ని నిరూపించే బలమైన సాక్ష్యాలు ఉంటేనే నేరం అవుతుంది" అని కోర్టు తేల్చి చెప్పింది. ఆంధ్రప్రదేశ్ పోలీసుల రిమాండ్ రిపోర్టులో రావణ్కు వ్యతిరేకంగా ఎలాంటి బలమైన ఆధారాలు లేవని ఒక రిటైర్డ్ హైకోర్టు న్యాయమూర్తి ‘సౌత్ ఫస్ట్’ కు తెలిపారు. ఇంతేకాదు ఆయన చేసిన వ్యాఖ్యల కారణంగా ఎక్కడా ఉగ్రవాద లేదా హింసాత్మక సంఘటనలు జరగలేదన్నారు. కేవలం నక్సలైట్లను మెచ్చుకోవడంతో పాటు వారికి మద్దతుగా మాట్లాడినంత మాత్రాన ‘ఉపా’ చట్టం వర్తించదని ఆ రిటైర్డ్ న్యాయమూర్తి స్పష్టం చేశారు. ప్రభుత్వాన్ని విమర్శించే వారికి ఒక ‘హెచ్చరిక’ ను పంపడంతో పాటు విమర్శకుల గొంతు నొక్కడానికే రావణ్పై ఇంతటి కఠినమైన చర్యలు తీసుకున్నారని ఏపీ ప్రభుత్వంలో ఉన్నవారు చెపుతున్నారు. ప్రభుత్వాలకు వ్యతిరేకంగా వచ్చే అభిప్రాయాలను, నిర్మాణాత్మక విమర్శలను స్వీకరించే సహనమే ప్రజాస్వామ్యానికి రక్షణ కవచం. అలా కాకుండా అణిచివేతకు దిగితే తాత్కాలికంగా నోళ్లు మూయించవచ్చేమో కానీ అదే శాశ్వత పరిష్కారం కాదనే నిజాన్ని పాలకులు గ్రహించలేకపోతున్నారు. భిన్న దృక్పథాలతో కూడిన ఆరోగ్యకరమైన చర్చలు జరిగే వైవిధ్యభరిత సమాజమే ప్రగతిశీల రాష్ట్రానికి మూలస్తంభం. అలా కాకుండా రాజ్యాంగేతర శక్తుల ఒత్తిడికి లొంగి లేదంటే రాజకీయ పంతాలకు పోయి ప్రజలపై కక్షసాధింపు చర్యలకు పాల్పడితే.. ఇప్పటికే కుల సమీకరణల సుడిగుండంలో చిక్కుకుని ఉన్న ఏపీ సమాజం మరింత వెనుకబడిపోతుంది. అదే జరిగితే ముఖ్యమంత్రి చంద్రబాబు నాయుడు ఆశిస్తున్న "ఆధునిక ఆంధ్రప్రదేశ్" కల సాకారం కావడం అసాధ్యం. వ్యాసకర్త:- జి.ఎస్. వాసు