PCC చీఫ్ వద్దకు చేరిన కొండా వర్సెస్ కడియం రచ్చ

వరంగల్ కాంగ్రెస్(Warangal Congress) రాజకీయం మరో మలుపు తీసుకుంది. కొంతకాలంగా జిల్లా రాజకీయాల్లో ఆధిపత్య పోరు సాగిస్తున్న మంత్రి కొండా సురేఖ(Konda Surekha), స్టేషన్ ఘన్పూర్ ఎమ్మెల్యే కడియం శ్రీహరి(Kadiyam Srihari)ల మధ్య వివాదం ఇప్పుడు నేరుగా పీసీసీ (PCC) చీఫ్ దగ్గరకు వెళ్ళింది. గురువారం ఉదయం మంత్రి కొండా సురేఖ.. పీసీసీ చీఫ్ మహేశ్ కుమార్ గౌడ్ను పర్సనల్గా కలిసి జిల్లా రాజకీయ పరిణామాలపై తీవ్ర అసంతృప్తిని వ్యక్తం చేశారు. తన పరిధిలోని దేవాదాయ శాఖ అంశాలపై.. తనకు కనీస సమాచారం ఇవ్వకుండా ఎమ్మెల్యే కడియం శ్రీహరి ఏకపక్షంగా రివ్యూ మీటింగ్ పెట్టడంపై ఆమె ఫైర్ అయ్యారు. ఒక ఇన్-చార్జ్ మంత్రిగా ఉన్న తనను కాదని, అధికారులతో అలా సమీక్షా సమావేశం నిర్వహించడం కంప్లీట్గా రూల్స్ బ్రేక్ చేయడమేనని పీసీసీ చీఫ్కి వివరించారు. పార్టీ సీనియర్ లీడర్ అయిన కడియం శ్రీహరిపై వెంటనే పార్టీ పరంగా కఠినమైన క్రమశిక్షణా చర్యలు తీసుకోవాలని కొండా సురేఖ పీసీసీ చీఫ్ను డిమాండ్ చేశారు. ఈ ప్రొటోకాల్ ఇష్యూపై తాను ఇప్పటికే ముఖ్యమంత్రి రేవంత్ రెడ్డికి కూడా లేఖ కూడా రాసినట్లు మహేశ్ కుమార్ గౌడ్ దృష్టికి తీసుకెళ్లారు. మంత్రి కొండా సురేఖ ఇచ్చిన ఈ ఫిర్యాదుపై పీసీసీ చీఫ్ మహేశ్ కుమార్ గౌడ్ సానుకూలంగా స్పందించారు. ఉమ్మడి వరంగల్ జిల్లా నేతల మధ్య ఉన్న వివాదాలు, వర్గ రాజకీయాలపై (Groupism) తాము ఎప్పటికప్పుడు గ్రౌండ్ రిపోర్ట్స్ తెప్పించుకుంటున్నామని చెప్పారు. త్వరలోనే కొండా సురేఖ, కడియం శ్రీహరి ఇద్దరితో మాట్లాడి.. వివాదాన్ని పరిష్కరిస్తామని అన్నారు. ఇదే టైమ్లో పరిపాలనతో పాటు పార్టీ ప్రతిష్టకు భంగం కలిగిస్తే ఎవరినీ ఉపేక్షించేది లేదని మహేశ్ కుమార్ గౌడ్ గట్టి వార్నింగ్ ఇచ్చారు. వరంగల్ జిల్లాలో కొండా సురేఖ, కడియం శ్రీహరి వర్గాల మధ్య గత కొంతకాలంగా ఇంటర్నల్ గ్రూప్ పాలిటిక్స్ నడుస్తున్నాయి. తాజాగా బొగ్గులకుంటలోని దేవాదాయ శాఖ కార్యాలయంలో ఎమ్మెల్యే కడియం శ్రీహరి అధికారులతో సమావేశం కావడం ఈ ఇద్దరి మధ్య వివాదాలకు ఆజ్యం పోసినట్లయింది. తన పరిధిలోని దేవాదాయ శాఖపై తనకు ఎలాంటి ముందస్తు సమాచారం ఇవ్వకుండా, నిబంధనలకు విరుద్ధంగా కడియం శ్రీహరి అఫీషియల్ సమీక్ష జరిపారని కొండా సురేఖ తీవ్ర అభ్యంతరం వ్యక్తం చేస్తూ సీఎం రేవంత్ రెడ్డికి లేఖ రాశారు. ఆ లేఖలో తాను ప్రస్తావించిన అంశాలపై విచారణ జరిపి.. కడియం శ్రీహరిపై చర్యలు తీసుకోవాలని గట్టిగా డిమాండ్ చేశారు. ఇక ఈ లేఖ వ్యవహారంపై ఎమ్మెల్యే కడియం శ్రీహరి కూడా అంతే ఘాటుగా స్పందించారు. సురేఖ పేరు డైరెక్ట్గా ఎత్తకుండానే ఆయన పరోక్షంగా గట్టి చురకలు అంటించారు. "కొందరు కావాలనే కాంట్రవర్సీలు క్రియేట్ చేస్తూ ప్రజల మధ్యలో ఉండాలనుకుంటున్నారు" అంటూ కీలక వ్యాఖ్యలు చేశారు. అయితే ఇప్పుడు ఈ పంచాయితీ పీసీసీ వద్దకు చేరడంతో తెలంగాణ రాజకీయం ఒక్కసారిగా వేడెక్కింది. ఇటు సీఎం రేవంత్ రెడ్డి, అటు పీసీసీ చీఫ్ మహేశ్ కుమార్ గౌడ్ ఇద్దరికీ మంత్రి కొండా సురేఖ ఫిర్యాదు చేయడంతో.. ఈ ఇష్యూపై అధిష్ఠానం ఎలాంటి నిర్ణయం తీసుకోబోతుందనేది ఆసక్తికరంగా మారింది. మరి పీసీసీ చీఫ్ చెప్పినట్లు త్వరలోనే ఇద్దరు నేతలతో మాట్లాడి ఈ ‘వరంగల్ వార్’కు ఫుల్ స్టాప్ పెడతారా.. లేక ఈ గ్రూప్ పాలిటిక్స్ మరిన్ని మలుపులు తిరుగుతాయా అనేది చూడాలి.