నిరంజన్ మృతిపై పవన్ కళ్యాణ్ ఎమోషనల్ ట్వీట్

ఆంధ్రప్రదేశ్ డిప్యూటీ సీఎం, జనసేన అధినేత పవన్ కళ్యాణ్ వీరాభిమాని పొనుగంటి నిరంజన్ (చిన్నారి) అనారోగ్యంతో కన్నుమూశాడు. హనుమకొండకు చెందిన 17 ఏండ్ల నిరంజన్.. గత కొంతకాలంగా ఒక అరుదైన జన్యు సంబంధిత వ్యాధితో పోరాడుతున్నాడు. అయితే పరిస్థితి విషమించడంతో తల్లిదండ్రులు మెరుగైన చికిత్స కోసం అతడిని హైదరాబాద్కు తీసుకువచ్చారు. అక్కడ ఒక ప్రైవేట్ ఆసుపత్రిలో అత్యవసర చికిత్స మంగళవారం రాత్రి నిరంజన్ ఆఖరి శ్వాస విడిచాడు. ఈ వార్త తెలుసుకున్న పవన్ కళ్యాణ్ తీవ్ర దిగ్భ్రాంతికి గురయ్యారు. నిరంజన్ను తాజాగా కలిసిన క్షణాలు ఇంకా తన మదిలో సజీవంగా ఉన్నాయంటూ భావోద్వేగంతో ట్వీట్ చేశారు. డిప్యూటీ సీఎం ఆవేదన కొద్ది రోజుల క్రితం హనుమకొండలోని నిరంజన్ ఇంటికి వెళ్లి అతడిని కలిసిన సందర్భాన్ని పవన్ తన పోస్టులో గుర్తు చేసుకున్నారు. "నిరంజన్ ఇక లేడనే వార్త నా హృదయాన్ని తీవ్రంగా కలచివేసింది. కొద్ది రోజుల క్రితం హనుమకొండలో నిరంజన్ ఇంటికి వెళ్లి కలిసిన ఆ క్షణాలు ఇంకా నా మదిలో సజీవంగానే ఉన్నాయి. తీవ్రమైన అనారోగ్యంతో పోరాడుతూనే నా కోసం ఎదురుచూసిన ఆ చిన్నారి.. నన్ను చూడగానే అతని ముఖంపై విరిసిన ఆ చిరునవ్వు.. ఇవన్నీ ఎప్పటికీ మరవలేని జ్ఞాపకాలుగా నిలిచిపోతాయి" అని తన ట్వీట్ లో తెలిపారు. "నిరంజన్ శరీరం వ్యాధితో పోరాడినా, అతని మనసు మాత్రం అపారమైన ధైర్యంతో నిలిచింది. అంతటి బాధను అనుభవిస్తూ కూడా జీవితం పట్ల అతను చూపించిన ఆశ, ఆత్మవిశ్వాసం ఎంతో విలువైనవి. అలాంటి ధైర్యవంతుడైన చిన్నారి ఇంత త్వరగా మనల్ని విడిచి వెళ్లిపోవడం ఎంతో బాధాకరం" అంటూ పవన్ ఆవేదన వ్యక్తం చేశారు. కుటుంబానికి ప్రగాఢ సానుభూతి నిరంజన్ కుటుంబానికి తన సపోర్ట్ ప్రకటిస్తూ పవన్ కళ్యాణ్ మరో ట్వీట్ చేశారు. "నిరంజన్ కుటుంబ సభ్యులకు నా ప్రగాఢ సానుభూతిని తెలియజేస్తున్నాను. తీరని దుఃఖాన్ని భరించే శక్తిని భగవంతుడు వారికి ప్రసాదించాలని ప్రార్థిస్తున్నాను. ప్రియమైన నిరంజన్.. నువ్వు చూపించిన చిరునవ్వు, ధైర్యం, నువ్వు పంచిన ప్రేమ నా హృదయంలో ఎప్పటికీ నిలిచిపోతాయి. నీ ఆత్మకు శాంతి చేకూరాలని భగవంతుడిని ప్రార్థిస్తున్నాను" అని రాసుకొచ్చారు. https://twitter.com/PawanKalyan/status/2074746985425560036 నెరవేరని పవన్ మాట అరుదైన వ్యాధి కారణంగా మంచానికే పరిమితమైన నిరంజన్కు పవన్ కళ్యాణ్ అంటే పిచ్చి అభిమానం . ఈ విషయం తెలిసిన పవన్ కళ్యాణ్ స్వయంగా నిరంజన్ ఇంటికి వెళ్లి కలిశారు. ఆ సమయంలో పవన్ కల్యాణ్ అతడిని ఆప్యాయంగా హత్తుకుని ధైర్యం చెప్పారు. అతడితో కలిసి సెల్ఫీ దిగడమే కాకుండా తిరుమల శ్రీ వెంకటేశ్వరస్వామి ప్రసాదాన్ని అందించారు. తనకు ఒక కుక్కపిల్లను పెంచుకోవాలని ఉందని నిరంజన్ చెప్పగా, "కొని పంపిస్తా చిన్నా" అంటూ హామీ ఇచ్చారు. అదే రోజు కుక్కపిల్లను పంపించి తన మాట నిలబెట్టుకున్నారు. అంతేకాకుండా, "ఓజీ-2 సినిమా వచ్చినప్పుడు నువ్వే నా స్పెషల్ గెస్ట్. మనిద్దరం కలిసి సినిమా చూద్దాం" అని పవన్ చెప్పిన మాట అభిమానులను అప్పట్లో భావోద్వేగానికి గురి చేసింది. అయితే ఆ కోరిక నెరవేరక ముందే నిరంజన్ మృతి చెందడం పవన్ అభిమానులను తీవ్రంగా కలచివేస్తోంది. బండ్ల గణేష్ పరామర్శ పవన్ కళ్యాణ్ పర్యటన తర్వాత టాలీవుడ్ ప్రముఖ నిర్మాత బండ్ల గణేష్ వంటి వారు కూడా నిరంజన్ ఇంటికి వెళ్లి కుటుంబాన్ని పరామర్శించారు. తాము కూడా అండగా ఉంటామని భరోసా ఇచ్చారు. అంతా బాగుంది అనుకుంటున్న సమయంలోనే, వ్యాధితో పోరాడుతూ నిరంజన్ చిన్న వయసులోనే కన్నుమూయడం అటు పవన్ కళ్యాణ్ను, ఇటు జనసైనికులను తీవ్రంగా కలచివేస్తోంది.