దేశంలో పెరుగుతున్న జననాలు..ఎప్పటిలాగే దక్షిణాదిలో మాత్రం తగ్గుముఖం: ఒక్క తెలంగాణే మినహాయింపు

గడిచిన పదేళ్లలో దేశవ్యాప్తంగా జననాల నమోదు (Birth Registrations) పెరుగుతుంటే, దక్షిణాది రాష్ట్రాల్లో మాత్రం ఈ ట్రెండ్ రివర్స్ లో ఉంది. కేంద్ర ప్రభుత్వం విడుదల చేసిన 'సివిల్ రిజిస్ట్రేషన్ సిస్టమ్ (CRS) - 2024' నివేదిక ప్రకారం..దక్షిణాది ఐదు రాష్ట్రాల్లో నాల్గింటిలో జననాల నమోదు భారీగా తగ్గింది. అయితే ఒక్క తెలంగాణ మాత్రమే జననాల నమోదులో పాజిటివ్ గ్రోత్ నమోదు చేసింది. దక్షిణాది vs జాతీయ సగటు 2015లో దేశవ్యాప్తంగా జననాల నమోదు 2.31 కోట్లుగా ఉంటే, 2024 నాటికి అది 10.1 శాతం పెరిగి 2.55 కోట్లకు చేరింది. దీనికి భిన్నంగా దక్షిణ భారతంలో జననాల నమోదు భారీగా తగ్గింది. గత దశాబ్ద కాలంలో (2015-2024) కేరళలో అత్యధికంగా 33.2 శాతం జననాల నమోదు తగ్గగా, తమిళనాడులో 27.3 శాతం, ఆంధ్రప్రదేశ్లో 20.1 శాతం, కర్ణాటకలో 5.8 శాతం చొప్పున జననాల నమోదు పడిపోయింది. ఎక్కువ మంది పుడుతున్నది ఎక్కడ? ఈ రాష్ట్రాల్లోని పరిస్థితికి భిన్నంగా తెలంగాణలో మాత్రం జననాల నమోదు భారీగా పెరిగింది. తెలంగాణలో 2015లో 6,12,489 గా ఉన్న జననాల నమోదు, 2024 నాటికి 25.8 శాతం వృద్ధితో 7,70,616 కి చేరుకుంది. అలా అని సౌత్ ఇండియాలో ఒక్క తెలంగాణలోనే ఎక్కువ మంది పిల్లలు పుడుతున్నారని అనుకోవద్దు. ఈ నివేదిక ప్రకారం దక్షిణాది రాష్ట్రాల్లో అత్యధికంగా పిల్లలు పుడుతున్నది కర్ణాటక ( 9,91,879 జననాలు ) లోనే. 2024 లో రిజిస్టర్ అయిన సంఖ్యల ప్రకారం దక్షిణాది రాష్ట్రాల ఆర్డర్ ఇదీ: కర్ణాటక: 9,91,879 జననాలు (దక్షిణాదిలో టాప్) తమిళనాడు: 8,48,294 జననాలు తెలంగాణ: 7,70,616 జననాలు ఆంధ్రప్రదేశ్: 6,80,002 జననాలు కేరళ: 3,44,766 జననాలు (దక్షిణాదిలో అత్యంత తక్కువ) రిజిస్ట్రేషన్ల లోపాలు.. ఏపీలో అత్యల్పం తెలంగాణ కంటే మిగతా దక్షిణాది రాష్ట్రాల్లో జననాల సంఖ్య తక్కువగా కనిపించడానికి ఆయా రాష్ట్రాల్లోని రిజిస్ట్రేషన్ల ప్రక్రియ కూడా ఒక కారణం. కేరళ, ఆంధ్రప్రదేశ్లలో 10 నుంచి 14 శాతం జననాలు అసలు రికార్డుల్లో నమోదు కావడమే లేదు. తెలంగాణ: 2023, 2024 సంవత్సరాల్లో పుట్టిన ప్రతీ ఒక్క శిశువును రిజిష్టర్ చేశారు. తెలంగాణలో ప్రసవాల నమోదు ట్రాకింగ్ సిస్టమ్ బలంగా ఉండటంతో 100% జననాల నమోదుతో టాప్లో నిలిచింది. కర్ణాటక, తమిళనాడు: ఈ రాష్ట్రాల్లో పుట్టిన ప్రతీ బిడ్డ వివరాలు ప్రభుత్వానికి సకాలంలో చేరడం లేదు. అందుకే ఇక్కడ వరుసగా 97.5%, 94.8% జననాలు మాత్రమే నమోదయ్యాయి. ఆంధ్రప్రదేశ్: ఏపీలో జననాల నమోదు దశాబ్ద కాలంలోనే అత్యంత కనిష్ట స్థాయికి (6.80 లక్షలు) పడిపోయింది. ఇక్కడ 89% జననాల నమోదు మాత్రమే పూర్తవుతోంది. కేరళ: ఇక కేరళ విషయానికొస్తే ఇక్కడ రిజిస్ట్రేషన్ల శాతం 2019లో 98.2% ఉండగా, 2024 నాటికి అది 86.4% కి పడిపోయింది. లింగ నిష్పత్తిలో తెలంగాణకు షాక్ జననాల నమోదు విషయంలో తెలంగాణ టాప్లో ఉన్నా.. లింగ నిష్పత్తి (Sex Ratio) విషయంలో మాత్రం రాష్ట్ర పరిస్థితి బాగాలేదు. జాతీయ సగటు లెక్కలు చూస్తే ప్రతి 1000 మంది మగపిల్లలకు దేశంలో 933 మంది ఆడపిల్లలు పుడుతున్నారు. తెలంగాణ తప్ప మిగతా దక్షిణాది రాష్ట్రాల్లో జననాల నమోదు తగ్గినా.. అక్కడ పుట్టే పిల్లల్లో ఆడ, మగ నిష్పత్తిపై ఆ ప్రభావం పడలేదు. జననాల నమోదులో అందరికంటే వెనుకబడ్డ కేరళ.. లింగ నిష్పత్తిలో మాత్రం దేశంలోనే టాప్లో ఉంది. అక్కడ ప్రతీ 1000 మంది మగపిల్లలకు 970 మంది ఆడపిల్లలు పుడుతున్నారు. ఆ తరువాతి స్థానాల్లో కర్ణాటక (946), తమిళనాడు (938) ఉన్నాయి. కానీ, జననాల నమోదు ఎక్కువగా ఉన్న తెలంగాణలో మాత్రం లింగ నిష్పత్తి 915 నుండి 910 కి పడిపోయింది. ఆంధ్రప్రదేశ్లో కూడా ఇది 935 నుండి 929 కి తగ్గడం కొంత ఆందోళనకర విషయమే. పట్టణాల్లోనే ఎక్కువ జననాలు ఇంకో ఆసక్తికర విషయం ఏంటంటే దక్షిణాదిలో అన్ని రాష్ట్రాల్లో గ్రామీణ ప్రాంతాల కంటే పట్టణాల్లోనే ఎక్కువ జననాలు నమోదవుతున్నాయి. తెలంగాణ, కర్ణాటక, తమిళనాడు రాష్ట్రాల్లో మెజార్టీ జననాలు నగరాలు, పట్టణాల్లోనే నమోదవుతున్నాయి. దక్షిణాది మొత్తంలో గ్రామీణ ప్రాంతాల్లో ఎక్కువ జననాలు నమోదు అవుతున్న ఏకైక రాష్ట్రం ఆంధ్రప్రదేశ్ మాత్రమే. బర్త్ సర్టిఫికెట్.. ఎప్పుడు తీసుకుంటున్నారు? పుట్టిన ఎన్ని రోజులకు బర్త్ సర్టిఫికెట్ తీసుకుంటున్నారనే విషయంలో కూడా రాష్ట్రాల వారీగా భారీ వ్యత్యాసాలున్నాయి. తెలంగాణ: ఇక్కడ పుట్టిన 21 నుండి 30 రోజుల లోపు మెజార్టీ ప్రజలు రిజిస్ట్రేషన్ చేసుకుంటున్నారు. కర్ణాటక: ఇక్కడ నెల నుండి ఏడాది లోపు లేట్ రిజిస్ట్రేషన్లు ఎక్కువగా జరుగుతున్నాయి. ఆంధ్రప్రదేశ్: ఏపీలో పుట్టిన ఏడాది దాటిన తర్వాత లేట్గా బర్త్ సర్టిఫికెట్ తీసుకునే వారి సంఖ్య (1,12,053) దేశంలోనే చాలా ఎక్కువగా ఉంది. ఉత్తరాదితో పోలిస్తే దక్షిణాది రాష్ట్రాలు జనాభా నియంత్రణలో ముందంజలో ఉన్నాయని, అయితే తెలంగాణ మాత్రం భిన్నమైన డెమోగ్రాఫిక్ ట్రెండ్తో (పెరుగుతున్న జననాలతో) ముందుకు వెళ్తోందని ఈ కేంద్ర ప్రభుత్వ నివేదిక స్పష్టం చేస్తోంది.