ముస్లిం రిజర్వేషన్ల కోసం సుప్రీంకోర్టుకు సీఎం విజయ్

తమిళనాడు టీవీకే ప్రభుత్వం ముస్లిం రిజర్వేషన్ల అంశంపై సుప్రీంకోర్టును ఆశ్రయించింది. హిందూ మతం నుంచి ముస్లింగా మారిన వాళ్లకు రిజర్వేషన్లు ఇవ్వకూడదంటూ మద్రాస్ హైకోర్టు ఇచ్చిన గతంలో ఓ సంచలన తీర్పును ఇచ్చింది. ఇప్పుడు ఆ తీర్పును సవాల్ చేస్తూ సీఎం విజయ్ ప్రభుత్వం సుప్రీంకోర్టులో పిటిషన్ దాఖలు చేసింది. 2024 మార్చిలో తమిళనాడు గవర్నమెంట్ ఒక జీవో (Government Order) తీసుకొచ్చింది. దాని ప్రకారం.. బీసీ (BC), ఎంబీసీ (MBC), డీఎన్సీ (DNC), ఎస్సీ (SC) కమ్యూనిటీస్ నుంచి ఎవరైనా హిందువులు ఇస్లాం మతంలోకి మారితే.. వాళ్లకు బ్యాక్వర్డ్ క్లాస్ ముస్లిం (BCM) కేటగిరీ కింద పరిగణించాలని ఆ జీవోలో తెలిపింది. ఆ ఉత్తర్వుల ఆధారంగానే లబ్ధిదారులకు కమ్యూనిటీ ధ్రువీకరణ పత్రాలను కూడా జారీ చేయడం ప్రారంభించారు. ముఖ్యంగా అన్సార్, దెక్కని ముస్లిం, దుబేకుల, లబ్బాయిస్, రౌథర్, మరకాయర్, మపిల్లా, షేక్, సయ్యద్ వంటి ముస్లిం వర్గాలకు ఈ రిజర్వేషన్లు వర్తింపజేశారు. అయితే, గవర్నమెంట్ తీసుకున్న ఈ నిర్ణయాన్ని సవాల్ చేస్తూ కోర్టులో కేసులు ఫైల్ అయ్యాయి. దీనిపై విచారణ జరిపిన మద్రాస్ హైకోర్టు మదురై బెంచ్.. 2026లో ఒక సంచలన తీర్పునిచ్చింది. తమిళనాడు గవర్నమెంట్ 2024లో ఇచ్చిన ఆ జీవో రాజ్యాంగ విరుద్ధమని తేల్చేస్తూ దాన్ని కొట్టేసింది! జస్టిస్ జి.ఆర్. స్వామినాథన్ , జస్టిస్ పి.బి. బాలాజీలతో కూడిన బెంచ్ ... గతంలో హైకోర్టులు, సుప్రీంకోర్టు ఇచ్చిన వివిధ న్యాయపరమైన తీర్పులకు ఈ ఉత్తర్వులు పూర్తిగా వ్యతిరేకంగా ఉన్నాయని తెలిపింది. హిందూ మతం నుంచి ఇస్లాం మతంలోకి మారిన వ్యక్తిని కేవలం ముస్లింగా మాత్రమే పరిగణించవచ్చని.. అంతే కానీ వారికి బీసీ హోదా కింద రిజర్వేషన్లు ఇవ్వడం చెల్లదని స్పష్టం చేసింది. మద్రాస్ హైకోర్టు ఇచ్చిన ఈ తీర్పును తమిళనాడులో ఇటీవల అధికారంలోకి వచ్చిన విజయ్ ప్రభుత్వం తీవ్రంగా పరిగణించింది. గోవధ నిషేధాన్ని ఎత్తివేయాలనే డిమాండ్ల తర్వాత.. ఇప్పుడు ముస్లిం రిజర్వేషన్ల రక్షణ కోసం టీవీకే ప్రభుత్వం సుప్రీంకోర్టు గడప తొక్కింది. హైకోర్టు తీర్పును సవాలు చేస్తూ జులై 4, 2026 నాడు సుప్రీంకోర్టులో స్పెషల్ లీవ్ పిటిషన్ (SLP) దాఖలు చేసింది. సుప్రీంకోర్టు ముందు గవర్నమెంట్ ఒక స్ట్రాంగ్ పాయింట్ పెడుతోంది. ఒక వ్యక్తి కేవలం తన మతాన్ని మార్చుకున్నంత మాత్రాన.. సమాజంలో అతని వెనుకబాటుతనం, చదువు పరంగా అతను ఫేస్ చేస్తున్న ఇబ్బందులు రాత్రికి రాత్రే మాయమైపోవు అని వాదిస్తోంది. క్యాస్ట్ బ్యాక్గ్రౌండ్ వల్ల వచ్చే సోషల్ డిస్అడ్వాంటేజెస్ అలాగే ఉంటాయని.. కాబట్టి మతం మారిన వాళ్లకు కూడా రిజర్వేషన్లు కొనసాగించడం సామాజిక న్యాయం అని గట్టిగా చెబుతోంది. ఈ పాలసీ వల్ల రిజర్వేషన్ సిస్టమ్కు ఎలాంటి నష్టం జరగదని అంటోంది. దేశవ్యాప్తంగా రిజర్వేషన్ల పరిధిపై ప్రభావం చూపించే ఈ కేసుపై సుప్రీంకోర్టు ఎలాంటి నిర్ణయం తీసుకోబోతుందనేది ఇప్పుడు సర్వత్రా ఆసక్తికరంగా మారింది.