ముంబై, పూణేలను ముంచెత్తిన ముసురు.. జనజీవనం అస్తవ్యస్తం

దేశవ్యాప్తంగా రుతుపవనాలు ఊహించని విధంగా బీభత్సం సృష్టిస్తున్నాయి. ముఖ్యంగా మహారాష్ట్రలో గత మూడు రోజుల నుంచి ఏకధాటిగా కురుస్తున్న భారీ వర్షాలు ముంబై, పూణే నగరాలను పూర్తిగా జలదిగ్భంధం చేశాయి. పూణే జిల్లాలోని ఫేమస్ టూరిస్ట్ ప్లేస్ లోనావాల (Lonavala) లో కేవలం 24 గంటల్లోనే రికార్డు స్థాయిలో ఏకంగా 670 మిల్లీమీటర్ల వర్షపాతం నమోదైంది. భిరా, తంహిని లాంటి ఏరియాల్లోనూ 500 మి.మీ పైగా వాన పడింది. బీమా నది ఉధృతి పెరగడంతో ఉజ్జయిని డ్యామ్లోకి వరద నీరు పోటెత్తుతోంది. ముంబైతో పాటు తీర ప్రాంత జిల్లాల్లోని ప్రధాన నదులన్నీ ప్రమాద స్థాయిని దాటి ప్రవహిస్తుండటంతో రాయగఢ్ జిల్లాకు అధికారులు రెడ్ అలర్ట్ జారీ చేశారు. ఈ వరదల వల్ల మహారాష్ట్రలో ఇప్పటివరకు 18 మంది చనిపోయారు ఎడతెరపి లేకుండా కురుస్తున్న వర్షాల కారణంగా ..ఇప్పటికే పలు జిల్లాల్లోని స్కూళ్లు, కాలేజీలకు సెలవులు ప్రకటించారు. ముంబై వర్షాల వల్ల వసాయ్–నలాసోపారా మధ్య రైల్వే ట్రాక్లు పూర్తిగా నీట మునిగిపోయాయి. లోకల్ ట్రైన్స్ ఆగిపోవడంతో ఆఫీసుల నుంచి ఇళ్లకు వెళ్లే జనాలు మోకాళ్ల లోతు నీళ్లలో నడుస్తూ తీవ్ర ఇబ్బందులు పడ్డారు. జనరల్గా ముంబై నగరానికి మూడు వైపులా సముద్రం (నీరు) ఉంటుంది. ఇప్పుడు నాలుగో వైపు కూడా వరద నీరు వచ్చి చేరడం, రోడ్లు, రైల్వే ట్రాక్లు దెబ్బతినడంతో ముంబై నగరం మిగతా ప్రాంతాలతో సంబంధాలు తెగిపోయి ఒక ఐలాండ్(ద్వీపం)లా మారిపోయింది. ముంబయి-పుణె, ముంబయి-అహ్మదాబాద్, ముంబయి-కొంకణ్ లాంటి ప్రధాన రహదారులన్నీ క్లోజ్ అయిపోయాయి. ముంబయి-పుణె ఎక్స్ప్రెస్ వే లో ట్రాఫిక్ కష్టాలు తీర్చడానికి 'మిస్సింగ్ లింక్' పేరుతో 13.3 కిలోమీటర్ల బైపాస్ను రూ.6,695 కోట్లతో రీసెంట్గా నిర్మించారు. ఇందులో రెండు భారీ సొరంగాలు, ఒక కేబుల్ బ్రిడ్జ్ కూడా ఉన్నాయి. కేవలం 9 వారాల కిందటే ముఖ్యమంత్రి దేవేంద్ర ఫడ్నవీస్ దీన్ని ప్రారంభించారు. అయితే, ఇప్పుడు కురుస్తున్న వానలకి ఈ టన్నెల్ సమీపంలోనే కొండ చరియలు విరిగిపడ్డాయి. దీంతో ముంబై వెళ్లే మార్గంలో రాకపోకలు పూర్తిగా నిలిచిపోయి భారీగా ట్రాఫిక్ జామ్ అయింది. అఫీషియల్స్ దాదాపు 18 గంటల పాటు నిరంతరంగా శ్రమించి మట్టిని తొలగించి రూట్ని క్లియర్ చేశారు. మరో రెండు రోజులు భారీ వర్షాలు ఉండటంతో ముంబై సహా పలు జిల్లాలకు వాతావరణ శాఖ రెడ్ అలర్ట్ జారీ చేసింది. కేవలం మహారాష్ట్రలోనే కాదు.. దేశంలోని మిగతా రాష్ట్రాల్లోనూ వానలు దంచికొడుతున్నాయి. జమ్మూకశ్మీర్ లోని డోడా, కిష్త్వార్ జిల్లాల్లో ఆకస్మిక వరదలు (Flash Floods) వచ్చాయి. తాత్రి పట్టణంలో కొండచరియలు విరిగిపడి ఇళ్లు, షాపులు డ్యామేజ్ అయ్యాయి. రోడ్డు పక్కన పార్క్ చేసిన కార్లు, బైకులు చీనాబ్ నదిలో కొట్టుకుపోయాయి. దీంతో డోడా-కిష్త్వార్ నేషనల్ హైవే బంద్ అయింది. కేరళలోని వయనాడ్లో భారీ వర్షాల వల్ల అనక్కంపొయిల్-కల్లాడి సొరంగం (Tunnel) కన్స్ట్రక్షన్ సైట్ దగ్గర కొండచరియలు విరిగిపడ్డాయి. ఈ ప్రమాదంలో ఇద్దరు కార్మికులు చనిపోగా.. శిథిలాల కింద మరో 30 మంది వరకు చిక్కుకున్నట్లు సమాచారం. రెస్క్యూ టీమ్స్ కొందరిని కాపాడి హాస్పిటల్కు తరలించాయి. ప్రస్తుతం మలప్పురం - వయనాడ్ రూట్లో ట్రాఫిక్ పూర్తిగా స్తంభించింది. వీటితో పాటు .. ఉత్తరాఖండ్, హిమాచల్ ప్రదేశ్, ఛత్తీస్గఢ్, ఒడిశాలో కూడా వాతావరణ శాఖ అలర్ట్ ఇచ్చింది. ప్రజా ప్రతినిధులు , అధికారులు అంతా ప్రజలను అప్రమత్తం చేస్తున్నారు . అవసరమైతే తప్ప బయటకు రావొద్దని.. సురక్షితంగా ఉండాలని సూచిస్తున్నారు