అతిగా వ్యాయామం చేస్తున్నారా? ఈ 5 లక్షణాలు మీలో కనిపిస్తే వెంటనే అలర్ట్ అవ్వండి

ఈ రోజుల్లో ఆరోగ్యంగా, దృఢంగా ఉండటం అందరికీ ఒక అలవాటులా మారిపోయింది. ఉదయాన్నే లేవగానే జిమ్ కి వెళ్లడం లేదా ఇంట్లోనే రకరకాల ఎక్సర్సైజులు చేయడం చాలా మంచి అలవాటు. రోజుకు కనీసం అరగంట చొప్పున వారానికి 150 నిమిషాల పాటు వ్యాయామం చేయాలని ఆరోగ్య నిపుణులు సూచిస్తున్నారు. ఏదో చేశామా అంటే చేశాం అని కాకుండా, శరీరానికి కాస్త చెమట పట్టేంతవరకు శ్రమపడితేనే ఫలితం ఉంటుంది. అయితే ఫిట్నెస్ మీద ఉన్న ఆసక్తితో చాలామంది తమ శారీరక సామర్థ్యానికి మించి, విపరీతంగా వ్యాయామాలు చేసేస్తుంటారు. "అతి సర్వత్ర వర్జయేత్" అన్నట్లు.. అతి వ్యాయామం వల్ల లాభాల కంటే నష్టాలే ఎక్కువ. మీ వ్యాయామం పరిమితి దాటిపోతుందని మీ శరీరం కొన్ని లక్షణాల ద్వారా మీకు హెచ్చరికలు ఇస్తుంది. అవేంటో ఇప్పుడు చూద్దాం! బరువు పెరగడం మీరు అవసరానికి మించి వ్యాయామాలు చేస్తుంటే గనుక మీ శరీరం తీవ్ర ఒత్తిడికి లోనవుతుంది. దీంతో శరీరంలో 'కార్టిజోల్' అనే స్ట్రెస్ హార్మోన్ స్థాయిలు విపరీతంగా పెరిగిపోతాయి. ఈ హార్మోన్ మీ జీవక్రియలను దెబ్బతీసి, మీ బరువు పెరిగేలా చేస్తుంది. కండరాల నొప్పులు మొదట్లో కొత్తగా వ్యాయామం మొదలుపెట్టినప్పుడు కండరాల నొప్పులు రావడం చాలా సహజం. కానీ, ఆ నొప్పులు రోజురోజుకూ తగ్గాలి. అలా కాకుండా వ్యాయామం చేశాక వారం గడుస్తున్నా కండరాల నొప్పులు తగ్గడం లేదు అంటే.. మీరు పరిమితికి మించి కష్టపడుతున్నారని అర్థం. కండరాలు కోలుకోవడానికి సమయం ఇవ్వకపోతే ఈ నొప్పులు దీర్ఘకాలంలో మిమ్మల్ని వేధిస్తాయి. అలాంటి సమయంలో వెంటనే డాక్టర్ ని సంప్రదించడం అత్యుత్తమం. మూడ్ స్వింగ్స్ అతిగా వ్యాయామం చేస్తే కేవలం శారీరక ఆరోగ్యం మాత్రమే కాదు, మానసిక ఆరోగ్యం కూడా దెబ్బతింటుంది. అలసట కారణంగా శరీరంలో చురుకుదనం తగ్గి.. చీటికి మాటికీ కోపం రావడం, ఆందోళన, కుంగుబాటు (డిప్రెషన్) వంటి లక్షణాలు కనిపిస్తాయి. మీ మానసిక పరిస్థితి సడన్గా మారిపోతుంటుంది. గుండె దడ మితిమీరిన వ్యాయామాలతో విశ్రాంతి తీసుకునే సమయంలో కూడా గుండె వేగంగా కొట్టుకోవడం స్టార్ట్ అవుతుంది. మీరు చేసిన ఓవర్ ఎక్సర్సైజుల తాలూకు అలసట నుంచి కోలుకోవడానికి శరీరం ఎక్కువ సమయం తీసుకుంటుంది. ఫలితంగా మామూలుగా ప్రశాంతంగా ఉన్న సమయంలో కూడా గుండె వేగంగా కొట్టుకుని దడగా అనిపిస్తుంది. నిద్ర పట్టకపోవడం సాధారణంగా వ్యాయామం చేస్తే రాత్రిపూట ప్రశాంతంగా నిద్ర పడుతుంది. కానీ అతిగా ఎక్సర్సైజులు చేయడంతో ప్రశాంతతను ఇచ్చే 'పారాసింపథెటిక్ నాడీ వ్యవస్థ' సరిగ్గా పనిచేయదు. పైగా రాత్రిపూట కూడా ఒత్తిడి హార్మోన్ మోతాదులు ఎక్కువగా ఉంటాయి.ఇవన్నీ కలిసి మీ పడుకునే సమయాన్ని పాడుచేసి, నిద్రలేమికి దారితీస్తాయి. శరీరం దృఢంగా ఉండటం ఎంత ముఖ్యమో.. మన శారీరక సామర్థ్యాన్ని గౌరవించడం కూడా అంతే ముఖ్యం. ఆరోగ్యకరమైన శరీరం కోసం వ్యాయామం చేయాలి కానీ, శరీరాన్ని హింసించకూడదు. పైన చెప్పిన లక్షణాలలో ఏ ఒక్కటి మీలో కనిపించినా, వెంటనే అలర్ట్ అవ్వండి. మీ వర్కవుట్స్ ను తగ్గించండి లేదంటే కాసేపు విశ్రాంతి తీసుకొని మళ్లీ స్టార్ట్ చేయండి.